DUNDAN SIBUNGAS GUNA RAIS SIBURAN, KA SIBUNGAS DAYA PAKAI BITANG PINURUK ADI DUN BITANG SIKARA

Posted by Cdr.Robot on November 14, 2006 at 15:58:15:

DUNDAN SIBUNGAS GUNA RAIS SIBURAN, KA SIBUNGAS DAYA PAKAI BITANG PINURUK ADI DUN BITANG SIKARA

Agi anak tumang ju madis, pak pimanug ngara anu mating daya puan. Ngapui, di anu gawai daya, bait di tipuh jajak buan, mating daya an piduri ngara anu ; amai anak tumang jaman jah taun daya duh piduri : day kiris timbang ka kiris kasong adu. Jadi ngara anu duh inu anak tumang pak pak bitang adi dun Sikara, adi muh muun so rangit re di nai suto pijadi adat ka ong bidyuh. Sabab anu inu mating manusia adi puan pimanug ngara, nga daya harap ngara sawu anak tumang adu ; amai kan daya siken ka ngara ati nang adup-i anak tumang patu.

Jadi kan ngara muh raju bigaur nga daya ong, agi ni anu meh ngara ati samah maad ka rangit. Darum ngara maad ka rangit, di atang taru, sude sibusu-i ari nang asung-i baduh an nok ; pak kan ayuhsakanu bara ngan kaka-i da ayuh nyijun adu nug ka ngara muh nug tarun yun-i ruu. Pak ruai ruai sude ati duh tan nyijun asung-i baduh, ka-i rabu abu sabab raru ramah-i. Ka pinyirabu-i nyatuk ta Bijawa. Sabab anu inu rais Jawa jadi kaya jaman jah.

Jadi agi ni naan daya dari di Siburan dun Sikaya. Sikaya ati agi biyun tunang dayung paguh. Darum-i bitunang ayuh nai jengi umuh sadi-i. Jadi agi ni anu ayuh di nuruk umuh-i, nga muko nuruk ayuh re mine rubang turuk-i gut-i kiris bine padi ari agi sidia di rubang turuk adi ko-i turuk. Duh tui ayuh nuruk ka turuk-i muh papu. Ayuh ngitak buko-i, rasu pirasing turuk-i di tibung tuud. Darum-i pirasing turuk-i agi deya tipasik di tibung tuud anu. Kan Sikaya kiris deya agi tipasik di tibung tuud anu ayuh inga inga. Ka darum-i bipikir kayuh ati nganu guh ni naan dayung paguh guguh mijog di tibung tuud anu buang sindu kaja-i tawan bideya.¹ jadi kan Sikaya kiris, ayuh rasu dakup, ka darum-i dakup, dayung anu ng di Sikaya, “ Kiang ‘ta mari adu ka ramin.” Jadi so nganu inu ngara ati bibanuh bisawun. Dun dayung anu Sikamba ; pak Sikaya duh puan nang ayuh agi manug so rangit, papas bintang anu adi ju madis, isa-i nai suto pimudip manusia.

Jadi duh tui Sikaya ruu nga sawun-i Sikamba ka-i biranak ni naan anak dari,ka-i kadun anak anu Simanggeng. Darum sawun-i ruu mira Simanggeng, banuh-i Sikaya tanggah nga tunang-i adi dawu. Ka darum-i nai tangga, sawun-i Sikamba nakap ni adud, ka-i nyiringo kaja-i nga supek rambui¹ ka-i da mikabur. Jadi adud anu mikabur tudu Sikaya darum-i aun tanggah, rasu kuut kubab-i. Kan Kaya kinyam agi kayuh kuut kubab-i, ayuh nupap ; ka-i kiris ni adud dog kisong kaja-i nga supek rambui. Jadi so anu ayuh muh pu nang sawun-i muh puan adup-i nai sarah nga dayung bukun : amai mating daya bukun adi ngutai rambui di jam anu, kiang sawun-i adu.

¹ Ngapui nug anu ati daya adi pakai adat sumbuk babai jah abah-i pirasing turuk-i di tibung tuud ; amai dayung adi dun Sikamba, adi pinandung adup-i di Sikaya, agi mijog di tibung tuud jaman jah.
Dum duwuh taruh anu ripas anu, Sikamba agi minyu di banuh-i, nang-i, “ Aku-ti re mari ka rais adup-ami : kiang sikambuh sipagi kuu nakit nakit adu mira anak-ta ati. Jadi kan angan birumuh, nakit nakit tingga pimanu bitang adi num sirah ; amai kambui pimu bitang anu muh re nug yun rangit, angan rikas rikas adu nauu raba umuh-ngan. Jadi kambui bitang anu muh ruu di yun rangit, angan kuko kraja umuh-ngan. Kan pimanu bitg anu muh miringe tura ka simudup batuh anu, angan rikas adu nuruk purun padi-ngan ; amai kambui bitang anu mun pauh jo muun-i ka sagan, padi muh duh re bisa kana pimudip-i amai sayup. Jdi kambui angan nuruk nga pimaad bitang, pimudip padi kana, pak bua-i arap nyigas. Dinge, kambui angan an bagan pingandu mun iken, pangan, jajak bua, padi baras, da manug ka rais-ngan, angan bisa siroh ni tungun duuh. Kan angan dapud duuh, angan rasu bigawai dieh. Darum angan aun bigawai dieh, angan jakuh atuh-i, ka nyirais pikiju kari di atuh duuh anu buang nyabut dun so purug pingandu adi raan ‘ngan. Gawai ati shiun dog kadun Gawai Tamui ; paris-i mai anu mai ngarum, ka angan bisa ruah so rais.”

¹ Rambui ati nga daya nai gawai Ukah dawun-i. Kan di tipuh gawai Ukah, daya adi jadi pinamang na di tunduh ubok-i. Pinamang, rati-i soldadu gawai Ukah adi pakai taup bubok, bitakin guh buko ka ngumban juah jaran, tunda pimakai soldadu umot kamang. Umot kamang, rati-i pingubak daya adi matak nyarang jaman jah. Ngapui, kan daya re di nyarang jaman jah, masin masin bangsa daya bagan kamang-i da manug jadi pingubak perang.
Jadi agi ni anu, darum Sikaya di ka tarun, sawun-i Sikamba nakit papa mamuh anak-i Simanggeng. Ko munu ayuh piguring ayuh na di ayun, rasu di muun ka ribo, di tabung ni tungun buru nu sikuwang, ka-i pijog na di rawa kamban-i. Jadi buru anu ayuh kidum kada dawun tijuk-i, ka kan ayuh muko pijog sikuwang buru anu ayuh sisuh anak-i da bisoh. Ripas anu, ayuh bagan bara madis-i adi rimuh sirah da muun so sikuwang buru anu di mit adup-i. Jadi kan dingan-i muh manug, ayh rasu maad ka rangit samah dingan-i.¹ Nga singumi anu, Sikaya mari so umuh, ka-i kiris sawun-i muh mating, kiang dum anak-i adu ruu sadi guring di ayun, rasu-i puan nang sawun-i muh bu.

¹ Ngapui, so anu nug madin daya adi sita adat amba bigawai man sawa-i adi nga raput ngatum duh shiun suh pijog ni sikuwang barang rawang-i, na di tutuk kamban, amai yun-i bagan Kamba da muun so-nu di sua nai gawai-i. Sikuwang anu dun Tajur ; jadi gawai di tipuh raput ngatum dun Sitangid. Jadi kan daya muko masin masin pijog Tajur-i, ayuh kisong ni anak radai di puun sikuwang anu ka na masam masam pinguman adi kana, mun anak pugang, bai baid, deya siok ka duut iken. Kan pinguman muh sidia ko dog na di tunduh radai anu, ni naan nyamba, pingubak gawai, bidoa bagan Sikamba da manug nai gawai-i. Nyamba anu bidoa di akat sinduk puun Tajur, ka so nganu meh adat anu muh jadi. Kraja nyamb anu dug kadun Nai Sadis, amai agi sadis di sinduk puun Tajur di akat. Sadis, anu inu masam pinguman guh, na di tapan nutu nga bananb bauh. Kan daya ko bigawai daya bisa man sadis anu. Paris gawai anu pat ngarum yun daya bisa ruah dinge ka umuh. Kan ata kiris agi Tajur ko dog pijog di rais daya, ata puan meh nang ngara muko bigawai man sawa-i.
Simunu inu dundan pasar bitang adi num sirah, adi daya bidayuh pakai nga purun padi-i nug anu ati. Dun bitang anu Sikara : kambui duh sabab sibusu anu rabu, taun-i ju sirah.
Jadi stadun Simanggeng gi-shu ayuh ruu nga sama-i. Kan ayuh muh bas ayuh sawan, ka agi biranak duwuh madis anak dari, ni dun Sijur nga ni dun Sibarun. Jadi agi ni anu Simanggeng da anak-i ruu nga samba-i tagan-i ka tarun di nu kudos uwang ka umuh-i. Darum anak anu ruu nga samba-i, Sibarun rabu so rinjong tanju, ka-i nyatuk buang barak ka aru-i tawan. Jadi kan sama-i muh mari so tarun, samba-i kidaan di sama-i nang Sibarun agi rabu so rinjong tanju ka aru-i tawan. Jadi kan umur anak anu muh sapai num ju sawa, sama-i Simanggeng bu birayar ka rais Jawa. Muko nug bikaran, Simanggeng taban inged so ajung-i rasu maad tudu astana Rajah. Jadi ripas ko mamuh, Manggeng bada gaji-i tanuk birapui. Rasu daya bigaut sidia pinguman. Jadi darum-i man, Manggeng katuh sabi adi ko-i taban so rais adup-i, rasu nyigura re na di boba-i. Ka darum-i nyigura ayuh tingga sawun Rajah adi guru di rengah. Adup Rajah Jawa muh agi guh, sua guru diginu ; ji kiris Simanggeng nyigura man sabi anu, Rajah nyarah ayuh, nang, “ Mani meh kuu nyigura tingga sawun-ku?” Pak Simanggeng nam, nang-i, “ Duh inu aku singaja tingga sawun Rajah, pak taun mun gaya daya man kudos sabi.” Pak Rajah duh sabah di pinganang Manggeng ; ngapui-i rasu bagan ayuh nga-i re biraruh. Kambui Simanggeng arah, ayuh duh bisa mit sawun-i ; pak kambui Simanggeng manang, ka-i bisa mit sawun-i. Agi ni anu meh Rajah anu kidaan di Simanggeng nang-i, “ Anu tipagi ata biraruh kapug patis. Kambui kuu tungang kapug patis anu da tikapug, kuu bisa mit sawun-ku ; pak kambui kuu duh tungang da tikapug, aku re da daya siu kuu diti.” Kan Simanggeng dingah Rajah bijanji nga adup-i sakanu, anu jawa ayuh rasu na bukopandat-i ton-i na di tanju so isan nug ka kumbeng : amai akar-i re da buko anu paras isa-i bisa nga kapug patis. Jadi kan anu kumbeng, kan patis anu muh sidia, Simanggeng rasu mit buko pandat-i ka-i rasu diran di patis anu tikapug bada-i ; amai buko anu muh paras yun-i ko dawan ni anu anu. Pak Rajah Bijawa anu duh puan akar Simanggeng nga adup-i, jadi sawu arah meh Rajah Bijawa yun Simanggeng rawan biraruh pakai akar-i. So nganu Simanggeng mit sawun Rajah nu sawun-i, ka so nganu guh so purug daya di rais anu muh stabi di ayuh buang kibas ayuh da jadi Rajah dinu. Simunu meh Simanggeng dapud kwasa bas, ka-i udip darum sanang.

Pak di rais Siburan daya muh susah, amai so purug masam dang mun Taripiyu, Kirek, Situngga, Situet, Tikaking, Brikeng nga Rurok muh tikuruk ngudung ripaas pinyibu Manggeng, nang-i, “ Ani guna ta tia ruu di rais ati? Rajah-ta muh bu ka Jawa ; kiang ‘ta tunda adu ayuh kamanu.” Nga sawu, so purug ngara abo bu tunda Manggeng ka Jawa ; jadi so nganu meh rais Siburan muh pajam.

Ngapui muh duwuh taruh sawa ripas pinyibu Manggeng ka Jawa, ka anak-i adi suwuh madis, Sijur nga Sibarun, di nami ka rais Jawa re tudu ayuh kamanu. Kan ngara muh nug rais Jawa ngara rasu siken di daya, nang-i, “ Diki ramin Rajah Manggeng?” Jadi kan daya daya dingah ngara ati minyu sakanu, daya inga inga ; amai mating daya dinu tungang puus nyabut dun Manggeng, gut anak anu duh taru nyabut dun-i. Ngapui, muko dingah sakanu, ngara rasu di daan ka adup Rajah. Jadi kan Rajah dingah agah ati ayuh tuas rasu bada daya di mit anak anu ka yun adup-i. Pak kan daya da ngara di dapud Rajah ngara skari kari abah, pak mite da adup Rajah di ngajah adup-i ka bikaran. Pak kan Rajah muh puan piminyu anu ayuh muh makin bisa tuas-i, ka nganu guh ayuh mun ka bikaran buang sirata taban daya soldadu nga-i re rasu siu ngara di bikaran. Kan ayuh muh nug bikaran ayuh rasu siken ani pinganu ngara. Ngara nam, nang-i, “ Kieh manug re bidapud nga Rajah Bijawa di dun Simanggang.” Kan Rajah ngara agi minyu sakanu buang nybut dun-i, ayuh rasu pawut ubk Sibarun, digen di ubok adi tura ka aru-i yun-i re nyikaun tabuk anak anu. Pak darum-i nai simunu anak anu rasu dakup kaja Rajah. Jadi darum Rajah nyurah ubok anu di aru-i yun-i re tabuk nga karis, rasu ayuh kiris arit tawan agi di aru-i, ka nganu guh atin Rajah muh tikuka rada nang anu anak adup-i ; amai ayuh kiris arit tawan di aru-i. Jadi kan Rajah muh rada nang anu anak-i, ayuh rasu dakup buang-i re nga ayuh maad ka arun-i. Pak anak anu abah kambui sawun Rajah duh muun di mit ayuh ka bikaran. Kan sama-i kiris anak anu simunu, nganu guh ayuh pait daya da di mit sawun-i. Jadi kan sawaun Rajah muh afgi, ngara samah maad ka arun. Ngarum anu meh Rajah nai gawai bas di ramin-i, bagan so purug nyamba nymba nga soldadu-i guh, sabab-i gaun dapud anak-i dinge. Jadi so nganu meh Sijur nga Sibarun nyandong astana Rajah.

Ni anu sawun Rajah minyu di banuh-i, nang-i, “ Duh kah kuu rada anak-mu susah yang-i? Barang anu kuu di ngatur kraja daya ; jadi tagan-mu panu ayuh guru adu mun ani bipatun. Pak kayuh ani nang-i ku duh puan ; amai ayuh minyu pakai piminyu adup-i.” Dingah sawun-i sakanu Manggeng nam, nang-i, “ Kambui simuti, kiang ‘ku awar adu sipagi, re ngipa ayuh so ribo arun.” Nga sawu guh, Rajah isan makat mun ani re bu nai kraja-i. Jadi natis sama-i muh bu, ka Sibarun minyu, nang-i, “ O ‘Ma : mani meh kaam tagan rais-ta? Rais Siburan muh duh mun amba-i : tanda tanda jawa nga ngarum muh mating tia minyu, amai muh abo bu tunda kaam.”

Dingah anak-i sakanu, Rajah muh raru susah ; rasu-ui di dapud daya bada sidia duwuh buah arud. Ko munu, ayuh bagan anak-i, nang-i, “ Anu tipagi ka angan mari ; jadi angan bisa taban so purug pingadah isa-i rais-ngan bisa mun-mun-i sak-i adi dawu jah ; amai aku-ti duh bisa mari so-ti.” Anu jawa ngara mari ka taban so purug masam pingadah jawa ka ngarum. Ati inu dun-i :-
1. Taripayu : ayuh minyu re kireen jawa, arong pukor 4 a.m.
2. Kirek : ayuh minyu re kireen jawa, arong pukor 5 a.m.
3. Situngga :ayuh minyu re kidaan karum, arong pukor 3 p.m.
4. Situet : kidaan karum guh, arong pukor 4 p.m.
5. Tikaking : kidaan karum guh, arong pukor 5 p.m.
6. Brikeg : kidaan karum guh, arong pukor 6 p.m.
7. Rurok : kidaan karum guh, arong pukor 6.30 p.m.

Jadi ripas Sibarun ko taban so purug daang daang ati so sama-i di rais Jawa, rais Siburan muh tipari mun amba-i.

Kan Sibarun muh bas ayuh sawan, ka sawun-i biranak anak dari duwuh madis, ni dun Sipungut, ka ni dun Sikadut. Jadi kan umur-i muh num ju sawa, pimas-i kabus tagan ngara duwuh. Ripas pinyikabus pimas-i, ngara ati udip sadi buang sangsara. Jadi agi ni sawa ngara ati suba nai jengi umuh tunda daya. Jadi agi ni anu daya da ngara sua matak nyaran aran umuh. Sawu guh ngara ati di sua nyaran nimun pinyibada daya. Kan anu muh kumbeng so purug ratus tikuruk samah samah man tubi adi inged ngara. Pak tadah guh Sipungut nga Sikadut, ni naan mating daya adi nak bagan ngara da sua man. Kan ngara ati kinyam adup-i kabung kabung di aran, duh dog piduri daya, ngara nang di dingan-i, “ Ja ata bu nyarap ka pang aran adu simadi ‘ta kajun daya abo man.” Jadi sawu ngara rasu kanu adu ka pang aran. Duh jo pimanu ngara so pang aran ngara rasu kiris ni jipuh rakat, raput-i dog tabuk umbung. Rasu Pungut nang di Sikadut,“ Kana ata mit adu jipuh ati yun ‘ta badang man.” Pak jipuh anu minyu, nang-i “ O pinanak, duhnyah angan ida ida nga aku ; kiang angan mit aku ka taban adu aku nga mari ka ramin-ku.” Nga sawu ngara duh siu jipuh anu, pak pirupas adu so atuh umbung buru yun-i taban kabis nga kanu. Jadi darum Pungut kabis jipuh anu ayuh nang, “ Diki ata mas kuu?” Rasu jipuh anu daan nang, “ Gi-bayuh.” Jadi ngara kanu adu adu. Sikasun-i ngara kiris tibande rubang tang murut ka darum darud. Jadi jipuh anu nang, “ Ati inu aran ramin-ami : kiang kuu turung kabis adu aku nug arun.” Jadi sawu guh ngara kanu murut rubang batuh anu. Gi-bayuh ngara mas jipuh anu agi jipuh bukun nang di dingan-i, “ Adoh! ani anu buuh manusia? Ja ata nakap-i yun’ta man.” Pak kan jipuh anu adi dog kabis dingah dingan-i sakanu, ayuh rasu nam dingan-i, nang-i, “ Duhnyah angan ida ida nga daya ati, amai kambui ayuh duh turung aku, jah aku muh kabus. Ayuh agi nai bas pinurung di aku ; amai dawu-i aku dog tabuk umbung buru, ka aku rkat nyasang dieh. Jadi ayuh guh adi turung kadi aku sonu, buang-i rasu kabis aku nga mari kamati.” Jadi kan Pungut muh mas jipuh anu, rasu jipuh anu nang di Sipungut, “ O nak, mating kayuh adi re ‘ku nga ngupah angan ; kiang ati adu ngyen ‘ku di angan.” Rasu jipuh anu tarik ni sisik-i so ribo tungo-i ka rasu ngyen di Sipungut. Ko munu ayuh nang di Sipungut nga Sikadut, “ Kayuh ati angan bisa rikas purun. Pak darum ‘ngan re purun ka gi kusah bait kriyak minyu duhnyah angan jadi purun-i : pak angan bisa taban ka tarun bukun adu.” Jadi ngara re suba purun di bak kuus, pak agi guh kusah kriyak minyu. Tubun-tubun-i taban sisik anu nga di ka tibung darud Siburan. Dinu meh ngara purun, amai darum ngara purun sawu ni mating guh kusah bait kriyak agi minyu. Jadi duwuh taruh buran asah-i ko dog purun, ngara di munan, ka ngara kiris timbu sisik anu : ayuh muh marui jadi gite. Jadi pat rimuh burn dinge ngara di munan-i, ka ngara kiris gite anu muh buan ; bua-i raru pisung, ka bua-i masam bisaka nyamba mun agong, tajau, kitawak, bande, badir, tipayan banda, gabuk, sapang, ka bagu masam kayuh adi bukun. Sipungut nga Sikadut duh daan di daya bukun pasar kayuh ati, nug ka adup daya puan sadi-i.

Jadi ni anu, di tipuh bua padi, duwuh naan daya re di nu ratai tanju ka tibung darud Siburan anu. Kan daya anu maad darud ayuh rasu kiris ni tungun gite bigatung puno nga masam masam kayuh bisaka nyamba jah. Muko-i kiris, duh-i jadi nu ratai-i, pak-i rasu bikaduh mari di kidaan ka daya darum rais nang agi gite bigatung puno nga masam masam bisaka nyamba di atuh-i. Jadi kan daya darum rais muh puan har ati, rasu rais ngudung ka nganu guh daya birusang matak ka tibung darud Siburan taban agong, bande, kitawak, gandang, baras, dut, den,ayo, siok nga-i re bigawai ngadap gite anu. Kan ngara nug puun gite anu ngara mak agong gandang-i, rasu so purug nyamba birajang maning puun-i, amai re an suba da rapat isa-i bisa mit bua-i. Jadi darum daya birajang dinu, manug ni naan dayung sibabo dun Sidiaa, nang-i, “ Nga mani angan bigawai ngadap gite ati : gite ati gite-ku.” Rasu ayuyh sua birajang mun daya guh ngadap-i : pak makin Sidiaa ati sua birajang makin gite anu du du rabis bigatung. Kan daya muh susah kinyam gite anu makin bigatung makin bigatung, ni naan pingibas bigawai nang di bara dingan-i, “ Kana angan di tudu Sipungut nga Sikadut da sua birajang, amai dum ngara duwuh adu adi mating sua diti.” Jadi kan daya dingah piminyu pingibas bigawai sakanu, daya rasu di mit Sipungut nga Sikadut ka ramin, da rasu manug ka puun gite. Pak kan daya kidaan piminyu pingibas gawai di ngara, Pungut nam nang-i, “ Taya kieh adi arap, daya adi ari dog nandan, dog tirawan, ka tumang patu, ka kieh re tipakai di kayuh munu adi raru girua saruh! Kiang adup-ngan adu sibisa-bisa-ngan nai gawai-ngan dinu : kieh-ti duh re di.” Jadi kan daya pinyisung dingah piminyu Pungut sakanu, ayuh rasu di daan ka pingibas gawai-i.

Kan daya dingah piminyu Pungut sakanu, daya rasu guga, ka bagu bara-i di mit Sipungut nga Sikadut ka ramin. Jadi kan Pungut muh agi sua nug puun gite anu, nganu guh gite anu muh agi nyimau rapat, pak gi-bayuh daya tungang mit bua-i. Jadi ripas ngan Pungut ko man, pingibas gawai da ayuh rasu makat birajang. Jadi kan ayuh birajang nganu guh gite anu rasu rapat nug tana atuh-i, ka nganu guh daya samah sun bua-i, rasu bikutung barang purug-i. Jadi kan daya muko kamas bikutung, ka ngara muh duh tia mak agong gandang bait birajang, nganu guh gite anu rasu makat bigatung dinge. Duh tui ripas anu manug dinge sibabo Diaa mite jengi utung ; pak bua adi kana muh abo dog kutung daya ratus, kaus-i agi dum ni pape gabuk, ka anu adu adu adi ngyen daya di Sidiaa. Jadi kan Diaa kiris tung jengi muh mating utung ayuh sien buang maad ka arun-i. Jadi darum ngara gi-babu dinu, manug ujen sabak ribut bisa, ka nganu guh gite anu tumbang, ka atuh-i maret rais Sikung. Ngapui rais Bisikung raru kaya-i jaman jah, ka nug madin babu agi agong tajau adi saruh gi-babu di rais-i, anu inu bua gite adi jah. Jadi kan gite anu tumbang, so purug daya adi agi dinu timbang ka mijup nyidungu guguh da pinyitumbang-i. Nga sawu atuh-i maret rais Sikung, pak puun-i marui jadi batuh Guna. Jadi ati inu sibungas Guna rais Siburan adi dog kadun Guna Pungut nga Sikadut nug anu ati. So gite ati Bisikung agi bimadis nga Siburan ; amai puun gite di rais Siburan, ka tubun-i di rais Sikung.
Sawa 1899 daya so Kuab agi bigaur nga daya so rais Siburan di nami ka rais Sikung. Jadi agi ni naan daya nyamba rais Siburan adi raru bas timagah bisa kwasa-i di pasar adat, bait di pasar uri-i ; amai muh mating daya bukun di rais Siburan adi mun ayuh. Dun nyamba ati Bai Mandai. Ayuh inu adi jadi Pinguru ngara di nami ka rais Sikung di jaman anu. Jadi kan ngara muh nug rais anu, daya Bisikung rasu nai gawai bas di rais-i nga ngadap bara anak Siburan. Jadi darum ngara bigaur rami rami ngarum anu, masin masin daya Bisikung nang dundan di anak Siburan pasar pinyitumbang gite Siburan adi tumbang maret rais-i nga atuh-i. Jadi stagar pinyitumbang gite Pungut nga Sikadut ati, Bisikung nga Siburan jadi bigagit nga dog nyapit ni manak.

Di darum pimari anak Siburan so Sikug, ngara agi murah rais Butuk. Jadi Bibutuk agi kajun di rais-i nga badir, nga sinapang, re-i nga ngadap bara anak Siburan adi mari so Sikung. Pak kan anak Siburan muh agi murah rais anu, masin masin Bibutuk mak sinapang nga badir-i, pak ni duh guh jawun stadun bara Siburan gi-murah. Pak kan bara Siburan muh jo, ka miriam nga sinapang ngara bisa jawun ; amai Bai Mandai, adi jadi Pinguru Siburan, agi biyun uri adi dun pimanat-apui. Uri pimanat-apui ati Bai Mandai dapud so darum tarun : rah-i mun tanduk payu bisakap ju, mun tiraping siok. Ripas-i ko dapud so tarun, ngarum anu ayuh agi pumuh, nga ni naan nyamba daan di ayuh nang tanduk payu anu jadi pimanat-apui.

Sawa 1913, Bai Mandai ati di ruu ka Kuab tudu anak-i Sidunga, dayung adi banan di Kuab. Sawa 1915, Bai Mandai ati jadi Christian ; ka so purug uri-i ayuh ngyen di Bishop Mounsey diu so-i masuk. Sawa 1918, ayuh kabus, ka-i dog nakit kubur di Kuab. Nug anu ati gi-mating daya di rais Siburan adi biyun pimandai mun pimandai Bai Mandai ; amai ayuh bisa nai adat so purug masam-i.